ಪಾಟ್ನಾ, ಎ.30 : ಬಿಹಾರದ ಮುಖ್ಯಮಂತ್ರಿ ಸಾಮ್ರಾಟ ಚೌಧರಿ ನೇತೃತ್ವದಲ್ಲಿ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಪಾಟ್ನಾದ ಸಂಜಯ ಗಾಂಧಿ ಜೈವಿಕ ಉದ್ಯಾನವನಕ್ಕೆ ಪಾಟ್ನಾ ಮೃಗಾಲಯ ಎಂದು ಹಾಗೂ ಸಂಜಯ್ ಗಾಂಧಿ ಡೈರಿ ತಂತ್ರಜ್ಞಾನ ಸಂಸ್ಥೆಗೆ ಬಿಹಾರ ರಾಜ್ಯ ಡೈರಿ ತಂತ್ರಜ್ಞಾನ ಸಂಸ್ಥೆ ಎಂದು ಮರುನಾಮಕರಣ ಮಾಡುವ ನಿರ್ಣಯ ಕೈಗೊಳ್ಳಲಾಗಿದೆ.
1973ರಲ್ಲಿ ಆರಂಭಗೊಂಡ ಮೃಗಾಲಯಕ್ಕೆ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅವರ ಪುತ್ರ ಸಂಜಯ ಗಾಂಧಿ ಹೆಸರನ್ನು ನೀಡಲಾಗಿತ್ತು. ಸುಮಾರು 153 ಎಕರೆ ವಿಸ್ತಾರ ಹೊಂದಿರುವ ಈ ಮೃಗಾಲಯದಲ್ಲಿ 110ಕ್ಕೂ ಹೆಚ್ಚು ಪ್ರಭೇದಗಳ 800ಕ್ಕೂ ಅಧಿಕ ಪ್ರಾಣಿಗಳು ಸಂರಕ್ಷಣೆ ಪಡೆಯುತ್ತಿವೆ.
1980ರಲ್ಲಿ ಬಿಹಾರ ರಾಜ್ಯ ಸರಕಾರ ಸ್ಥಾಪಿಸಿದ್ದ ಸಂಜಯ್ ಗಾಂಧಿ ಡೈರಿ ತಂತ್ರಜ್ಞಾನ ಸಂಸ್ಥೆ ಐಸಿಎಆರ್ ಮಾನ್ಯತೆ ಪಡೆದ ಸಂಸ್ಥೆಯಾಗಿದ್ದು, ಇಲ್ಲಿ ಡೈರಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಬಿಟೆಕ್ ಮತ್ತು ಎಂಟೆಕ್ ಪದವಿಗಳನ್ನು ಬೋಧಿಸಲಾಗುತ್ತಿದೆ.
ಸಚಿವ ಸಂಪುಟ ಸಭೆಯಲ್ಲಿ ಒಟ್ಟು 61 ನಿರ್ಣಯಗಳಿಗೆ ಅನುಮೋದನೆ ನೀಡಲಾಗಿದ್ದು, ಅದರ ಭಾಗವಾಗಿ ಮುಖ್ಯಮಂತ್ರಿ ವಿದ್ಯುತ್ ಬಳಕೆ ಸಹಾಯ ಯೋಜನೆಗೆ 23,165 ಕೋಟಿ ರೂ. ಮಂಜೂರು ಮಾಡಲಾಗಿದೆ. ಈ ಯೋಜನೆಯಡಿ ಗೃಹೋಪಯೋಗಿ ವಿದ್ಯುತ್ ಬಳಕೆದಾರರಿಗೆ ಪ್ರತಿ ತಿಂಗಳು 125 ಯೂನಿಟ್ ಉಚಿತ ವಿದ್ಯುತ್ ಒದಗಿಸುವ ವ್ಯವಸ್ಥೆ ಜಾರಿಯಲ್ಲಿದೆ.
