ಜಬಲ್ಪುರ್, ಮೇ 2 : ಒಂಬತ್ತು ಮಂದಿಯನ್ನು ಬಲಿ ಪಡೆದ ಮಧ್ಯಪ್ರದೇಶದ ಜಬಲ್ಪುರ್ನಲ್ಲಿ ನಡೆದ ಕ್ರೂಸ್ ಬೋಟ್ ದುರಂತದ ವೇಳೆ, ಕೊನೆಯ ಕ್ಷಣಗಳಲ್ಲಿ ತಾಯಿಯು ತನ್ನ ಮಗುವನ್ನು ಎದೆಗವಚಿಕೊಂಡಿರುವುದು ವೈರಲ್ ವಿಡಿಯೊದಲ್ಲಿ ಕಂಡು ಬಂದಿದೆ.
ನೀರು ದೋಣಿಯೊಳಗೆ ಪ್ರವೇಶಿಸಿದಾಗ ಪ್ರಯಾಣಿಕರು ಜೀವ ರಕ್ಷಕ ಜಾಕೆಟ್ಗಳತ್ತ ಧಾವಿಸಿದ್ದು, ಈ ವೇಳೆ ತಾಯಿಯು ಜಾಕೆಟ್ ತೊಟ್ಟುಕೊಂಡು ಮಗುವನ್ನು ಹಿಡಿದುಕೊಂಡಿರುವ ದೃಶ್ಯ ವಿಡಿಯೊದಲ್ಲಿ ಸೆರೆಯಾಗಿದೆ.
ಗುರುವಾರ ಸಂಜೆ ಜಲಾಶಯದ ಬಾರ್ಗಿ ಅಣೆಕಟ್ಟು ಬಳಿ ಬೋಟ್ ಮುಳುಗುವ ಮುನ್ನ ತಾಯಿ ಮತ್ತು ಮಗುವಿನ ಕೊನೆಯ ಕ್ಷಣಗಳನ್ನು ವಿಡಿಯೊದಲ್ಲಿ ಕಾಣಬಹುದು. ಹಲವು ಗಂಟೆಗಳ ಬಳಿಕ ರಕ್ಷಣಾ ತಂಡಗಳು ತಾಯಿ ಮತ್ತು ಮಗುವಿನ ಮೃತದೇಹಗಳನ್ನು ಪತ್ತೆ ಹಚ್ಚಿದ್ದು, ಇಬ್ಬರೂ ಒಂದೇ ಜೀವ ರಕ್ಷಕ ಜಾಕೆಟ್ನಲ್ಲಿ ಸುತ್ತಿಕೊಂಡಿರುವುದು ಕಂಡು ಬಂದಿದೆ.
ಮೃತದೇಹಗಳನ್ನು ನದಿತೀರಕ್ಕೆ ತರಲಾಗುತ್ತಿದ್ದಂತೆ ಕುಟುಂಬ ಸದಸ್ಯರು ಗದ್ಗದಿತರಾದರು. ಸ್ಥಳಕ್ಕೆ ಆಗಮಿಸಿದ್ದ ರಾಜ್ಯ ಸಚಿವ ರಾಕೇಶ್ ಸಿಂಗ್ ಅವರೂ ಭಾವುಕರಾದರು.
ಸುಮಾರು 30 ಪ್ರಯಾಣಿಕರನ್ನು ಕರೆದೊಯ್ಯುತ್ತಿದ್ದ ಬೋಟ್ ದಿಢೀರ್ ಬಿರುಗಾಳಿಗೆ ಸಿಲುಕಿ ಮಗುಚಿ ಬಿದ್ದಿದ್ದರಿಂದ ದುರಂತ ಸಂಭವಿಸಿದೆ. ಸಂಜೆ ಸುಮಾರು 6 ಗಂಟೆ ವೇಳೆಗೆ ಬಲವಾದ ಗಾಳಿ ಬೀಸಿದ್ದು, ನೀರು ಉಕ್ಕೇರಿ ದೋಣಿ ಮಗುಚಿಕೊಂಡಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಸಂತ್ರಸ್ತ ಕುಟುಂಬಗಳಿಗೆ ರಾಜ್ಯ ಸರ್ಕಾರ ಅಗತ್ಯ ನೆರವು ನೀಡುತ್ತಿದೆ ಹಾಗೂ ನಾಪತ್ತೆಯಾಗಿರುವವರಿಗಾಗಿ ಹುಡುಕಾಟ ಮುಂದುವರಿದಿದೆ ಎಂದು ಮುಖ್ಯಮಂತ್ರಿ ಮೋಹನ್ ಯಾದವ್ ತಿಳಿಸಿದ್ದಾರೆ.
