ವಾಷಿಂಗ್ಟನ್, ಜೂ. 9 : ಜಗತ್ತಿನ ಅತ್ಯಂತ ಸೂಕ್ಷ್ಮ ಸಮುದ್ರ ಮಾರ್ಗಗಳಲ್ಲಿ ಒಂದಾದ ಹಾರ್ಮುಝ್ ಜಲಸಂಧಿ ಸಮೀಪ ಅಮೆರಿಕ ಸೇನೆಯ ಎಎಚ್–64 ಅಪಾಚೆ ಹೆಲಿಕಾಪ್ಟರ್ ಸೋಮವಾರ ಅಪಘಾತಕ್ಕೀಡಾಗಿದ್ದು, ಅದರಲ್ಲಿದ್ದ ಇಬ್ಬರು ಸಿಬ್ಬಂದಿಯನ್ನು ಸುರಕ್ಷಿತವಾಗಿ ರಕ್ಷಿಸಲಾಗಿದೆ ಎಂದು ವರದಿಗಳು ತಿಳಿಸಿವೆ.
ಘಟನೆಯ ಕುರಿತು ಪ್ರತಿಕ್ರಿಯಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಹೆಲಿಕಾಪ್ಟರ್ ಪತನಗೊಂಡಿರುವುದನ್ನು ದೃಢಪಡಿಸಿದ್ದು, ಇಬ್ಬರು ಸಿಬ್ಬಂದಿಯೂ ಸುರಕ್ಷಿತರಾಗಿದ್ದಾರೆ ಎಂದು ತಿಳಿಸಿದ್ದಾರೆ.
ಅಪಘಾತಕ್ಕೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ. ಹೆಲಿಕಾಪ್ಟರ್ ಇರಾನಿನ ಗುಂಡಿನ ದಾಳಿಗೆ ತುತ್ತಾಗಿತ್ತೇ, ಯಾಂತ್ರಿಕ ದೋಷ ಉಂಟಾಗಿತ್ತೇ ಅಥವಾ ಕಾರ್ಯಾಚರಣೆಯ ವೇಳೆ ಬೇರೆ ತಾಂತ್ರಿಕ ಸಮಸ್ಯೆ ಎದುರಿಸಿತ್ತೇ ಎಂಬ ಎಲ್ಲಾ ಆಯಾಮಗಳ ಕುರಿತು ತನಿಖೆ ನಡೆಯುತ್ತಿದೆ ಎಂದು ಮೂಲಗಳು ತಿಳಿಸಿವೆ.
ಇಸ್ರೇಲ್ ಮತ್ತು ಇರಾನ್ ನಡುವಿನ ಹಲವು ದಿನಗಳ ಮಿಲಿಟರಿ ಸಂಘರ್ಷದ ಬಳಿಕ ಜಾರಿಯಲ್ಲಿರುವ ಕದನ ವಿರಾಮದ ನಡುವೆಯೇ ಈ ಘಟನೆ ಸಂಭವಿಸಿರುವುದು ಗಮನ ಸೆಳೆದಿದೆ.
ಹಾರ್ಮುಝ್ ಜಲಸಂಧಿಯಲ್ಲಿ ವಾಣಿಜ್ಯ ಹಡಗುಗಳ ಸುರಕ್ಷಿತ ಸಂಚಾರ ಖಚಿತಪಡಿಸಲು ಅಮೆರಿಕ ತನ್ನ ವೈಮಾನಿಕ ಮತ್ತು ನೌಕಾ ಕಾರ್ಯಾಚರಣೆಗಳನ್ನು ಮುಂದುವರಿಸಿದೆ. ಈ ಕಾರ್ಯಾಚರಣೆಗಳ ಭಾಗವಾಗಿ ಎಂಕ್ಯೂ–9 ರೀಪರ್ ಡ್ರೋನ್ಗಳು, ಎಫ್/ಎ–18 ಮತ್ತು ಎಫ್–35 ಯುದ್ಧ ವಿಮಾನಗಳ ಜೊತೆಗೆ ಅಪಾಚೆ ಹೆಲಿಕಾಪ್ಟರ್ಗಳನ್ನೂ ನಿಯೋಜಿಸಲಾಗಿದೆ.
ಇತ್ತೀಚಿನ ಸಂಘರ್ಷದ ಅವಧಿಯಲ್ಲಿ ಇರಾನ್ ಸುಮಾರು 30 ರೀಪರ್ ಡ್ರೋನ್ಗಳನ್ನು ಹೊಡೆದುರುಳಿಸಿದೆ ಎಂದು ವರದಿಗಳು ತಿಳಿಸಿವೆ. ಇದೇ ವೇಳೆ ಹಲವು ಅಮೆರಿಕ ಯುದ್ಧ ವಿಮಾನಗಳು ವಿವಿಧ ಕಾರ್ಯಾಚರಣೆಗಳಲ್ಲಿ ಕಳೆದುಹೋಗಿವೆ ಎನ್ನಲಾಗಿದೆ. ಪ್ರಸ್ತುತ ಅಪಘಾತವು ಸಂಘರ್ಷ ಆರಂಭವಾದ ಬಳಿಕ ಕಳೆದುಹೋದ ಮೊದಲ ಅಪಾಚೆ ಹೆಲಿಕಾಪ್ಟರ್ ಆಗಿರಬಹುದು ಎಂಬ ಅಂದಾಜು ವ್ಯಕ್ತವಾಗಿದೆ.
ಹೆಲ್ಫೈರ್ ಕ್ಷಿಪಣಿಗಳಿಂದ ಸಜ್ಜುಗೊಂಡಿರುವ ಎಎಚ್–64 ಅಪಾಚೆ ಹೆಲಿಕಾಪ್ಟರ್ಗಳು ಹಾರ್ಮುಝ್ ಜಲಸಂಧಿ ಪ್ರದೇಶದಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ. ಸಮುದ್ರ ಮಾರ್ಗಗಳಲ್ಲಿ ಗಸ್ತು ತಿರುಗುವುದು, ಸಣ್ಣ ದೋಣಿಗಳಿಂದ ಸಂಭವಿಸಬಹುದಾದ ದಾಳಿಗಳನ್ನು ತಡೆಯುವುದು ಹಾಗೂ ಪ್ರತಿಕೂಲ ಡ್ರೋನ್ಗಳನ್ನು ನಿಗ್ರಹಿಸುವ ಕಾರ್ಯಗಳಿಗೆ ಇವುಗಳನ್ನು ಬಳಸಲಾಗುತ್ತಿದೆ. ಹಾರ್ಮುಝ್ ಜಲಸಂಧಿ ಮತ್ತು ಪರ್ಷಿಯನ್ ಕೊಲ್ಲಿಯಲ್ಲಿ ಸಮುದ್ರ ಸಂಚಾರವನ್ನು ಸಾಮಾನ್ಯ ಸ್ಥಿತಿಗೆ ತರಲು ವಾಷಿಂಗ್ಟನ್ ಮತ್ತು ತೆಹರಾನ್ ನಡುವೆ ಮಾತುಕತೆಗಳು ನಡೆಯುತ್ತಿರುವ ನಡುವೆಯೇ ಈ ಅಪಘಾತ ಸಂಭವಿಸಿದೆ.
