ಬೆಂಗಳೂರು, ಜುಲೈ 21: ವಾಟ್ಸಾಪ್ನಲ್ಲಿ ಬಂದ ಮದುವೆ ಆಹ್ವಾನ ಪತ್ರಿಕೆಯ ರೂಪದಲ್ಲಿದ್ದ ಎಪಿಕೆ (APK) ಫೈಲ್ ಡೌನ್ಲೋಡ್ ಮಾಡಿದ ಪರಿಣಾಮ ಉಪ ವಲಯ ಅರಣ್ಯಾಧಿಕಾರಿಯೊಬ್ಬರು ಸುಮಾರು ₹10 ಲಕ್ಷ ಕಳೆದುಕೊಂಡಿರುವ ಸೈಬರ್ ವಂಚನೆ ಪ್ರಕರಣ ಬೆಳಕಿಗೆ ಬಂದಿದೆ.
ಅಧಿಕಾರಿಗೆ ಬಂದಿದ್ದ ಮದುವೆ ಆಹ್ವಾನ ನಿಜವಾದದ್ದು ಎಂದು ನಂಬಿ ಎಪಿಕೆ ಫೈಲ್ ಅನ್ನು ಮೊಬೈಲ್ನಲ್ಲಿ ಡೌನ್ಲೋಡ್ ಮಾಡಿ ಇನ್ಸ್ಟಾಲ್ ಮಾಡಿದ್ದರು. ನಂತರ ಜುಲೈ 14ರಂದು ಅವರ ಬ್ಯಾಂಕ್ ಆಫ್ ಬರೋಡಾ ಖಾತೆಯಿಂದ ಸತತ ವಹಿವಾಟುಗಳು ನಡೆದಿದ್ದು, ಪರಿಶೀಲಿಸಿದಾಗ ₹9,96,659 ಹಣ ವಂಚನೆಗೊಳಗಾಗಿರುವುದು ಗೊತ್ತಾಗಿದೆ.
ಸೈಬರ್ ಅಪರಾಧಿಗಳು ವಾಟ್ಸಾಪ್ ಮೂಲಕ ಮದುವೆ ಆಹ್ವಾನ ಪತ್ರಿಕೆ, ಶುಭ ಸಮಾರಂಭಗಳ ಆಹ್ವಾನ ಸೇರಿದಂತೆ ನೈಜವೆನಿಸುವ ಸಂದೇಶಗಳ ಹೆಸರಿನಲ್ಲಿ ಎಪಿಕೆ ಫೈಲ್ಗಳನ್ನು ಕಳುಹಿಸಿ ಮಾಲ್ವೇರ್ ಹರಡುತ್ತಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಒಮ್ಮೆ ಇಂತಹ ಫೈಲ್ ಇನ್ಸ್ಟಾಲ್ ಮಾಡಿದರೆ ಮೊಬೈಲ್ನ ಮೇಲಿನ ಸಂಪೂರ್ಣ ನಿಯಂತ್ರಣ ಅಪರಾಧಿಗಳ ಕೈಗೆ ಹೋಗುತ್ತದೆ. ಬ್ಯಾಂಕಿಂಗ್ ಮಾಹಿತಿ, ವೈಯಕ್ತಿಕ ದಾಖಲೆಗಳು, ಸಂದೇಶಗಳು ಸೇರಿದಂತೆ ಸೂಕ್ಷ್ಮ ಮಾಹಿತಿಯನ್ನು ಕದಿದು ಖಾತೆಯಿಂದ ಹಣ ಎಗರಿಸುವ ಸಾಧ್ಯತೆ ಇರುತ್ತದೆ.
ಅಪರಿಚಿತ ಮೂಲಗಳಿಂದ ಬಂದ ಯಾವುದೇ ಎಪಿಕೆ ಫೈಲ್ಗಳನ್ನು ಡೌನ್ಲೋಡ್ ಅಥವಾ ಇನ್ಸ್ಟಾಲ್ ಮಾಡಬಾರದು. ಯಾವುದೇ ಫೈಲ್ ತೆರೆಯುವ ಮೊದಲು ಅದರ ವಿಶ್ವಾಸಾರ್ಹತೆಯನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ಸೈಬರ್ ಪೊಲೀಸರು ಸಾರ್ವಜನಿಕರಿಗೆ ಎಚ್ಚರಿಕೆ ನೀಡಿದ್ದಾರೆ.
