Sports

ಐಪಿಎಲ್ 2020: ಡೇವಿಡ್‌ ವಾರ್ನರ್‌ ಸದಾ ನನಗೆ ಬೆಂಬಲ ಸೂಚಿಸುತ್ತಾರೆ -ರಶೀದ್ ಖಾನ್‌

ನವದೆಹಲಿ, ಸೆ 30- ರಶೀದ್‌ ಖಾನ್‌ ಸ್ಪಿನ್‌ ಮೋಡಿಯ ನೆರವಿನಿಂದ ಸನ್‌ ರೈಸರ್ಸ್ ಹೈದರಾಬಾದ್‌ ತಂಡ ಹದಿಮೂರನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನ 11ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 5 ರನ್‌ಗಳ ಗೆಲುವು ದಾಖಲಿಸಿತು. ಆ ಮೂಲಕ ಪ್ರಸಕ್ತ ಆವೃತ್ತಿಯಲ್ಲಿ ಹೈದರಾಬಾದ್‌ ಫ್ರಾಂಚೈಸಿಗೆ ಮೊದಲ ಗೆಲುವು ಇದಾಯಿತು.

ಮೊದಲು ಬ್ಯಾಟಿಂಗ್‌ ಮಾಡಿದ ಸನ್‌ ರೈಸರ್ಸ್ ಹೈದರಾಬಾದ್‌ ನಿಗದಿತ 20 ಓವರ್‌ಗಳಿಗೆ 4 ವಿಕೆಟ್‌ಗಳನ್ನು ಕಳೆದುಕೊಂಡು 162 ರನ್‌ಗಳನ್ನು ದಾಖಲಿಸಿತ್ತು. ಬಳಿಕ ಗುರಿ ಹಿಂಬಾಲಿಸಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ನಿಗದಿತ 20 ಓವರ್‌ಗಳಿಗೆ 7 ವಿಕೆಟ್‌ಗಳನ್ನು ಕಳೆದುಕೊಂಡು 147 ರನ್‌ಗಳಿಗೆ ಸೀಮಿತವಾಯಿತು.

ಸನ್‌ ರೈಸರ್ಸ್ ಹೈದರಾಬಾದ್‌ ಪರ ಮ್ಯಾಚ್‌ ವಿನ್ನಿಂಗ್‌ ಪ್ರದರ್ಶನ ತೋರಿದ ರಶೀದ್‌, ನಾಲ್ಕು ಓವರ್‌ಗಳಿಗೆ 14 ರನ್‌ ಗಳನ್ನು ನೀಡಿ 3 ವಿಕೆಟ್‌ಗಳನ್ನು ಕಬಳಿಸಿದರು. ಶಿಖರ್‌ ಧವನ್‌, ಶ್ರೇಯಸ್‌ ಅಯ್ಯರ್‌ ಹಾಗೂ ರಿಷಭ್‌ ಪಂತ್‌ ಸೇರಿ ಪ್ರಮುಖ ಮೂರು ವಿಕೆಟ್‌ಗಳನ್ನು ಪಡೆದ ರಶೀದ್‌ ಖಾನ್‌ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಪಂದ್ಯದಲ್ಲಿ ಬೌಲಿಂಗ್‌ ಮಾಡುವ ವೇಳೆ ನಾಯಕ ಡೇವಿಡ್‌ ಹೇಳಿದ್ದ ಸಂಗತಿಯನ್ನು ಇದೀಗ ರಶೀದ್‌ ಖಾನ್‌ ಬಹಿರಂಗಪಡಿಸಿದ್ದಾರೆ. “ವಾರ್ನರ್ ಯಾವಾಗಲೂ ನನ್ನನ್ನು ಬೆಂಬಲಿಸುತ್ತಾರೆ ಮತ್ತು ತಂಡಕ್ಕೆ ಯಾವುದು ಉತ್ತಮ ಎಂದು ನಿಮಗೆ ತಿಳಿದಿದೆ ಎಂದು ಹೇಳುತ್ತಾರೆ. ಇದನ್ನೇ ನಾವು ಮೈದಾನದಲ್ಲಿ ಚರ್ಚಿಸುತ್ತೇವೆ,” ಎಂದು ಪಂದ್ಯದ ಬಳಿಕ ರಶೀದ್‌ ಖಾನ್‌ ತಿಳಿಸಿದರು.

“ನನ್ನ ಮೇಲೆ ಒತ್ತಡ ಹೇರಲು ನಾನು ಬಯಸುವುದಿಲ್ಲ. ಶಾಂತವಾಗಿ ಮತ್ತು ಸಂಯೋಜನೆಯೊಂದಿಗೆ ತಂಡಕ್ಕೋಸ್ಕರ ನಾನು ಏನು ಮಾಡಬಹುದು ಎಂಬುದರ ಮೇಲೆ ನನ್ನ ಗಮನ ಕೇಂದ್ರೀಕರಿಸುತ್ತೇನೆ. ಇಂದು(ಮಂಗಳವಾರ) ಸ್ವಲ್ಪ ತ್ವರಿತವಾಗಿ ಬೌಲಿಂಗ್‌ ಮಾಡಿದ್ದೇನೆ. ಪಂದ್ಯದಲ್ಲಿ ಮೊದಲನೇ ಎಸೆತ ಹಾಕಿದಾಗಲೇ ಇದನ್ನೂ ನಾನು ಅರಿತುಕೊಂಡೆ. ಮೂರು ಎಸೆತಗಳ ಬಳಿಕ ವೇಗದ ಬಗ್ಗೆ ನೀವು ಅರಿತುಕೊಳ್ಳಬಹುದು. ಇಂತಹ ವಿಕೆಟ್‌ಗಳಲ್ಲಿ ಬ್ಯಾಟ್ಸ್‌ಮನ್‌ಗೆ ಬ್ಯಾಕ್‌ ಆಫ್‌ ಲೆನ್ತ್‌ಗಳನ್ನು ಹಾಕಬೇಕಾಗುತ್ತದೆ,” ಎಂದು ರಶೀದ್‌ ಖಾನ್‌ ತಿಳಿಸಿದರು.

ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ವಿಕೆಟ್‌ ಪಡೆಯದೆ ಹಿಂತಿರುಗಿದ್ದ ರಶೀದ್‌ ಖಾನ್‌, ಕೋಲ್ಕತಾ ನೈಟ್ ರೈಡರ್ಸ್ ವಿರುದ್ಧ 25ಕ್ಕೆ ಒಂದು ವಿಕೆಟ್ ಪಡೆದಿದ್ದರು. ಆದರೆ, ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸರಿಯಾದ ಸಮಯದಲ್ಲಿ ರಶೀದ್‌ ಖಾನ್‌ ಕಮ್‌ಬ್ಯಾಕ್‌ ಮಾಡಿದರು. ಮೂರು ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ಹೈದರಾಬಾದ್‌ ಫ್ರಾಂಚೈಸಿ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದರು.

“ಕಳೆದ ಒಂದೂವರೆ ವರ್ಷ ನನ್ನ ಪಾಲಿಗೆ ಕಠಿಣವಾಗಿತ್ತು. ಮೊದಲು ನನ್ನ ತಂದೆ ಕೊನೆಯುಸಿರೆಳೆದರು ಹಾಗೂ ಇದರಿಂದ ನಾನು ಹೊರಬರಲು ಸ್ವಲ್ಪ ಸಮಯ ಹಿಡಿಯಿತು. ಅಮ್ಮ ನನ್ನ ಅಭಿಮಾನಿಯಾಗಿದ್ದು, ವಿಶೇಷವಾಗಿ ಐಪಿಎಲ್‌ ಟೂರ್ನಿಯಲ್ಲಿ ಮ್ಯಾನ್‌ ಆಫ್‌ ದಿ ಮ್ಯಾಚ್‌ ಪಡೆದರೆ, ಅಂದಿನ ರಾತ್ರಿ ಕರೆ ಮಾಡಿ ನನ್ನ ಬಳಿ ಮಾತನಾಡುತ್ತಾರೆ,” ಎಂದು ರಶೀದ್ ಖಾನ್‌ ತಿಳಿಸಿದರು.

Related Articles

Leave a Reply

Your email address will not be published. Required fields are marked *

Back to top button
error: Content is protected !!